Home › Articles › Kapas mein safed makhi ka ilaaj: pehchan aur control
Kapas mein safed makhi ka ilaaj: pehchan aur control
Safed makhi (whitefly) kapas, sabziyon aur dosri faslon ka aam keeda hai. Ye patton ke neeche rehti hai, ras choos kar paudhe ko kamzor karti hai, aur kapas mein leaf curl virus phailane ka sabab bhi ban sakti hai.
Safed makhi ki pehchan
Patton ke neeche chhoti, safed, ur'ne wali makhiyan. Patta hilane par udti hain.
Patton par chipchipa madda (honeydew) aur uske upar kali phaphoond.
Patte peele ya murray huay hon to virus ka shak karein.
Control ke bunyadi usool
Roz nigrani: subah ke waqt patton ka neeche se muainah karein. Nuqsan ki had (threshold) ke liye apne ilaqe ke mehkama zaraat ya zarai officer se mashwara karein.
Jarri bootiyan saaf rakhein: khet aur kinaron ki jarri bootiyon par bhi safed makhi palti hai.
Zyada nitrogen na dein: bohat ghani aur narm fasal keeray ko zyada pasand aati hai.
Qudrati dushman bachayein: be-jaa aur be-waqt spray faida mand keeron ko bhi khatam kar deti hai.
Label par likhi dose aur tareeqe par hi amal karein. Ziyada dose faida nahi deti, nuqsan deti hai.
Har baar ek hi dawai ya ek hi group ki dawai na dohrayein, warna keeray mein mazahmat (resistance) paida ho jati hai. Mukhtalif groups ki dawaiyan badal badal kar istemal karein.
Spray subah ya shaam ke thandey waqt karein aur patton ke neeche tak achhi tarah pahunchayein.
Hamare paas safed makhi aur ras choos'ne walay keeron ke liye mukhtalif insecticides maujood hain. Konsi dawai aur kab istemal karni hai, is ke liye apne ilaqe ke zarai mahir se mashwara zaroor karein.